政Whats噏:議員孖頭議辦越見偏遠 開到去愉景灣

政Whats噏:議員孖頭議辦越見偏遠 開到去愉景灣

話說今屆立法會唔單止直選議員開地區辦事處,就連功能組別、選委會界別議員嘅地區辦事處都陸續開張,仲愈開愈遠添。繼選委界議員馬逢國喺大澳開設辦事處,選委界議員嚴剛同商界議員廖長江就喺愉景灣開設辦事處添。

嚴剛尋日下晝(20日)喺社交平台貼文指,佢同廖長江嘅聯合地區辦事處已經喺愉景灣順利開張,共同服務離島社區。附上嘅相片都見到,有唔少義工、商界人物出席,仲有切燒豬嘅環節。

雖則愉景灣同市區有段距離,但其實上次馬逢國喺更偏遠嘅大澳開議辦都已經超乎想像啦。佢當時話係希望大澳嘅辦事處可以為大嶼山南地區注入文化項目,令香港特色文化得以保存同埋推廣咁話。


Leave a Reply

Your email address will not be published.