政Whats噏:梁君彥議助人工6.9萬 未破前議員張華峰記錄


今屆立法會議員每年可申領嘅辦事處營運開支逾280萬港元,一眾議員對於幕後嘅助理亦都唔手緊,唔少議員助理人工都頗豐厚,其中人工最高嘅議助係立法會主席梁君彥嘅助理,月薪達6.9萬港元,薪金直逼區議會主席。之不過,呢個款額都仍未超越上屆金融服務界議員張華峰(肥老闆)嘅記錄,當時佢其中一名議助月薪接近7.4萬港元。

議會舊人繼續用「銀彈」攻勢留低資深議助,其中林健鋒就請咗7個議助,最高月薪嘅議助有6.23萬港元,新界西北直選議員田北辰就請咗8個人,人工最高嘅有6萬港元。鄉議局功能界別議員劉業強更請咗10個人,薪金最高嘅為6.3萬港元;另一方面,由於初嘗議事經驗,唔少議會「新丁」都以高價請議助,務求盡快上手,其中選委會界別嘅鄧飛同進出口界功能界別議員黃英豪,就分別以5.3萬港元同4.8萬港元請議助。

用咗6.8萬港元聘請助理嘅新界北直選議員張欣宇,自認議員生涯屬起步階段,需要一個資深人士協助,而該職員本身係資深議員助理,熟悉政治同議會事務,又曾任職智庫同商業機構。之不過,佢都話依家立法會嘅經費不足,可能要自己補貼開支,或要同其他界別議員商討共同聘請職員同營運辦事處。

喺議員助理嘅協助之外,唔少議員都請顧問幫手,不過薪水差距好大。例如建築、測量、都市規劃及園境界議員謝偉銓以4.1萬港元請顧問公司,協助社交媒體策略;選委會界別嘅劉智鵬就以1.8萬港元請顧問協助類似嘅媒體管理,相反李鎮強就只係用咗8千港元請顧問,為佢提供議會事務嘅建議等。至於同為選委會界別嘅陳曼琪同李浩然分別用1萬港元同5萬港元,請研究法律嘅顧問,分別研究香港法律及跨境法律調查,以及內地民商事判決等,其中李浩然一個報價更高達10萬港元。


Leave a Reply

Your email address will not be published.