政Whats噏:豪花逾13萬設攝影棚 林琳想做政界KOL?


社交平台向來都發揮好大影響力,而選委會界別嘅議員林琳都似乎領悟到呢個道理,事關佢豪花逾13萬港元,將位於中信大廈其中一個辦公室,加裝攝影棚同添加直播設備,唔知成效係點呢?

根據立法會議員申請發還開支文件顯示,先後有3間公司向林琳報價,其中一間公司以13.2萬港元,成功價低者得,向佢提供攝影棚設備、器材採購同直播室設置,其中裝修佔5萬港元,燈光器材要1.5萬港元,而相機等就要超過3.7萬港元。而林琳亦另外再購買直播燈架、用作拍攝嘅綠色屏幕等。林琳接受東網查詢時就話間房嘅位置唔方便,所以拎嚟改裝做拍片用途,亦會同黨友一齊用。之不過,因為第5波疫情,令到裝修停頓,依家先用咗1個月,遲啲會加埋假樹同茶几,甚至考慮做清談節目,而依家已經喺嗰度拍咗幾條片喇,仲話大家要拭目以待佢新一條,為社福機構拍攝嘅牙醫服務片喎。

網上平台咁重要,同樣係選委會界別議員嘅陳月明亦唔執輸,用咗108港元,買咗微博會員,仲可以用足12個月,保持同網民嘅溝通。至於林筱魯就比較關注香港發展,喺書店用76港元購入《基本法》同《維護國家安全法讀本》。而謝偉銓同吳永嘉就有閱報習慣,都分別用500港元同700多港元訂報紙。


Leave a Reply

Your email address will not be published.