政Whats噏:劏房如熔爐 林筱魯或邀孫玉菡感受「熱力」


酷熱天氣下,街外熱辣辣,劏房嘅室溫更超過40度,點頂?喺冷氣房做嘢嗰班高官,當睇唔到劏房戶嘅慘情?同選委會界別議員林筱魯傾開呢個問題,佢都話要搵啲官員親身體驗下劏房嘅「熱力」,要諗方法降溫先得。咁搵邊個?佢話應該係負責福利嗰個。即係勞工及福利局局長孫玉菡喇!

林筱魯話之前已經拉過線,搵咗房屋局局長何永賢去睇劏房同過渡屋,依家劏房咁焗熱,佢話班官冇理由唔知,做過立法會議員同區議員嘅青年都民政事務局長麥美娟應該好了解,咁應該搵邊過落去睇吓劏房嘅情況?去諗辦法?應該係負責福利嗰個喇!言下之意,即係勞福局局長孫玉菡,究竟佢幾時會去體驗劏房焗熱程度,就要拭目以待嘞!

其實天文台前台長林超英靠15cm嘅USB風扇降溫方法,亦曾將呢個建議畀咗政府,仲話鼓勵社福機構幫劏房戶安裝低耗能嘅氣流裝置。林筱魯就話辦法喺度,但都要睇實際環境,事關好多劏房係冇窗,甚至間房細到冇位擺風扇。佢仲話計劃喺開展地區工作,由於佢係SoCO(香港社區組織協會)嘅董事,所以將同SoCO合辦地區辧事處。至於幾時開到,暫時講唔埋。


Leave a Reply

Your email address will not be published.