波衫炒得起 曼聯最搶手

波衫炒得起 曼聯最搶手

球季開鑼,紅魔新戰袍重現Polo領,比去季波衫更值得收藏呢!(設計對白)球季開鑼,紅魔新戰袍重現Polo領,比去季波衫更值得收藏呢!(設計對白)

球季開鑼,紅魔新戰袍重現Polo領,比去季波衫更值得收藏呢!(設計對白)

歐洲四大足球聯賽陸續開鑼,餓波已久的球迷終於又可以通宵睇波!睇波以外,不少球迷都會買波衫支持愛隊,而波衫除咗着,仲可以炒,而且年份愈舊愈值錢!今次訪問的球衣收藏家林民俊先生便收藏逾千五件波衫,不少已經升值10倍以上,佢更向大家教路︰「C朗拿度、美斯就退休,買定佢哋波衫實冇衰!」

日本隊靚爆兼好炒

林民俊不但是一個波衫收藏家,更化興趣為職業,開舖專門售賣足球波衫。他說早於99年已經開始收集,年輕時最愛日本國家隊,因為他們是唯一不跟隨國際足協標準設計的隊伍,款式往往比其他國家隊更加好看。他憶述:「當年這些波衫香港冇得賣,要到日本四出尋寶先搵到,而且店主未必賣畀你。好似96年日本隊三浦知良件波衫,我要搭件川口能活龍門波衫先買到,但估唔到川口件衫依家升得仲勁,當年港元兌日圓只是六算,買入價HK$1,300左右,時至今日網上已經炒過萬,升值7倍以上!」

紅魔波衫多破萬

除了日本國家隊,身為魔迷的他也收藏了大量曼聯波衫,而且件件有歷史價值。「好似99年三冠王嗰件,採用Umbro最經典設計,手袖有章、翻領加拉鏈,當時齊字齊章都要賣HK$800,今日已經過萬!」問到最好賣的曼聯波衫,他說去年C朗拿度「愛回家」回歸曼聯時期銷情極佳,每天店外都大排長龍,不過要數最誇張是08年曼聯取得歐聯冠軍哪一件:「莫斯科之夜到今天依然叫曼迷津津樂道,記得數天就接咗500個Order,最後共賣出過千件!現時傑斯球迷版約賣HK$3,500,球員版就天價了!」

港足球星同受歡迎

他提到,儲波衫想升值,應盡量避免買冷門球隊或球員,入手曼聯、利物浦、皇馬等就最穩陣:「始終佢哋球迷多,較容易賣出,而且經得起時間考驗,好似柏金退休紀念賽對阿積士哪件,直到今天仲有阿仙奴球迷搵!」他補充說:「一些即將退役的球星波衫不妨入多兩件,好似C朗、美斯兩大球王就退休,十年廿年後波衫會相當值錢。新星則可以留意麥巴比、夏蘭特等。另外近年有個奇怪現象,就是內地不少收藏家鍾情香港昔日球星波衫,例如譚拔士、吳群立等波衫現在價值HK$5,000以上,拍得住碧咸!」

保值要留吊牌

除了購買外,球衣保值的方法也很重要,他教路波衫一定要留吊牌︰「就好似新車未落地,全新價值自然水漲船高,而且吊牌可與衫領Tag上的Product Code對照,以此辨別真偽。」他又提到,波衫宜放入密實袋再加雪梨紙及防潮珠保存,每隔半年拿出來掛起;清潔則建議以清水手洗,而且不要扭乾,否則印字或印章容易出現裂痕。最後問到入手渠道,他指買波衫要找有信譽的波衫舖或Online Store,若想執平貨可等至季中或季尾,有機會一至兩百元就買到,不過屆時就未必齊碼,要自行衡量風險!

球迷版 Vs 球員版

為支持愛隊,不少粉絲都會購買波衫,但同一款波衫價格可以相差數百元。林民俊表示:「波衫一般分球迷版及球員版兩類,後者因為落場用,所以用料偏向輕同薄,剪裁也較為貼身,收藏價值也較高。但由於膠章易爛,球迷們反而更偏向收藏用繡章的球迷版。」

教你點分真假

正版波衫吊牌印有球隊簡稱,例如曼聯主場的球迷版波衫印上MUFC H JSY,其中「H」代表主場,「A」代表作客,假如吊牌只簡單印上ADIDAS JERSEY或之類字眼,則很大機會是假貨。另外每件波衫都有一個獨特的Product Code,這組數字可上網搜尋得到,而且必須與吊牌紀錄一致,否則便一定是假!

上帝之手7千萬成交

阿根廷名將馬納當拿於2020年逝世,其真迹波衫變成珍寶。1986年世界盃足球賽半準決賽他施展「上帝之手」着用的波衫早前進行拍賣,結果以928萬美元(約HK$7,238萬)的天價成交,較估價500萬美元高出接近兩倍,成功打破拍賣史上最貴足球波衫及體育收藏品兩項健力士世界紀錄。

同場加映:新波衫率先睇

adidas包辦了今屆多支強隊的主客場波衫,臨近開鑼同大家率先睇!


Leave a Reply

Your email address will not be published.