中暑唔納職業病 港人返工似博命


所謂「夏日炎炎正好眠」,烈日當空,有得揀,又有邊個想返工?之不過香港家陣經濟不景氣,疫情又似有反彈趨勢,加上周邊地區局勢不穩,可以話係今日唔知聽日事,市民梗係想搵多個錢傍身!有別於一眾政府高官日日坐喺辦公室歎冷氣,香港有唔少打工仔都要喺戶外工作,天氣熱嘅時候,飲少啖水都好容易中暑!大家可能有疑問,搵食啫,何解搞到好似博命咁?皆因港府至今依然拒絕將中暑納入職業病,工友權益唔受法律全面保障,僱主又唔體諒,咪變成今時今日咁嘅局面囉!

嗱,勞工界多年嚟一直敦促港府加強對於「熱疾病」嘅職安健規管,當中就包括要求當局立法將中暑納入《僱傭補償條例》中可補償嘅職業病。之不過,勞福局局長孫玉菡尋日表明,難以將中暑納入職業病,原因係未能夠證明戶外工作中暑嘅風險,較其他戶外運動中暑嘅風險為高。功夫茶聽完當堂嚇一跳,然後得啖笑;戶外工作同戶外運動嘅分別有幾大,相信都唔使功夫茶詳述,兩者性質根本完全唔同,完全冇可比性;孫局長最起碼應該都明白,做運動嘅話,想幾時停就幾時停;至於打工呢,自然好多掣肘,邊有得話想幾時休息,就幾時休息呢?

孫局長又講到,勞工處去年收到嘅中暑工傷報告約20幾宗,難有證據推斷某種職業嘅中暑風險較高;呢樣真係有雞先定有蛋先嘅問題!工傷嘅定義係,僱員因工同埋喺工作期間發生意外而導致受傷,換言之,僱員只有喺工作期間中暑暈低,先可以報工傷;假如僱員喺返工嗰陣暴曬咗一輪,但收咗工先中暑暈低,點計?僱員點先證明到中暑係同工作期間長期暴曬有關?更何況,中暑可大可小,好多打工仔都試過輕微中暑,因為唔算職業病,僱主咪當僱員身體不適去處理,畀僱員休息吓,唔使呈報工傷㗎!之但係,打工仔日日咁曬法,身體好難冇影響㗎喎!

雖則話當局並唔係完全不理會打工仔嘅生死,都有意喺勞工處嘅《預防工作時中暑的風險評估》指引當中,加入天文台「暑熱指數」作參考指標,咁僱主就可以根據指引,制訂防止中暑嘅措施。之但係,初步方案要去到今年10月先開始諮詢,中秋都過咗啦;正式實施最快都要等到明年4月,即係話打工仔今年夏天注定要捱㗎啦!

假如話捱埋今年,下年會好啲,相信好多工友都唔介意,畢竟都捱咗咁多年。之不過呢項指引查實係冇法律約束力,僱主就算唔跟都唔會有咩後果。簡單嚟講,港府搞咁耐,查實又係將個波拋番畀僱主。講真,假如僱主係心地善良,仲使乜等港府推出指引,一早就為工友做足預防措施啦;假如不幸係無良僱主喎,打工仔注定有冤無路訴㗎啦!


Leave a Reply

Your email address will not be published.